kunjadu

ക്നാനായ സമുദായത്തില്‍ സന്യസ്തരുടെയും അല്‍മേനികളുടെയും പങ്ക്

2012-02-28T05:31:00.000-08:00

ക്നാനായ സമുദായത്തിലെ രണ്ടു ഘടകങ്ങള്‍ ആണ് സന്യസ്തരും അല്‍മായരും. വംശശുദ്ധി കാത്തു പരിപാലിക്കുക എന്ന ചരിത്ര ദൗത്യം അല്‍മായര്‍ നൂറ്റാണ്ടുകളായി പിന്തുടരുമ്പോള്‍ ദൈവവിളി എന്ന നിയോഗവുമായി സ്വന്തം രൂപതയിലും മറ്റ് രൂപതയിലും സേവനം ചെയ്യുക എന്നതാണ് സന്യസ്തധര്‍മ്മം. ആഗോള കത്തോലിക്കാ സഭയുടെ ഭാഗമെന്ന നിലയിലാണ് ക്നാനായ സന്യസ്തര്‍ക്ക് മറ്റ് രൂപതകളില്‍ സേവനം ചെയ്യാനുള്ള അധികാരം ലഭിച്ചിട്ടുള്ളത്‌.

ഇങ്ങനെ മറ്റ് രൂപതയില്‍ സേവനം ചെയ്യുന്ന അനേകം സന്യസ്തരും ഒന്നിലധികം മെത്രാന്മാരും ഉണ്ടെന്നുള്ളത് ഒരു യാഥാര്‍ത്ഥ്യം ആണ്. ഈ സന്യസ്തരോ മെത്രാന്മാരോ ക്നാനായ എന്ടോഗമിയുടെ തീവ്ര വക്താക്കള്‍ ആകേണ്ട ആവശ്യമില്ല. കാരണം വളരെ സിമ്പിള്‍ ; അവര്‍ അടുത്ത തലമുറയെ സൃഷ്ടിക്കുന്നില്ല.

എന്നാല്‍ അല്മേനി അങ്ങനെയല്ല. അവന് സമുദായത്തിന് വെളിയില്‍ ഒരു പെണ്ണിനോട് ഇഷ്ടം തോന്നിയാല്‍ വിവാഹം കഴിക്കുന്നതിന് സഭ എതിരല്ല, തൊട്ടടുത്തുള്ള കത്തോലിക്കാ പള്ളിയില്‍ അവനു ഇടവകാംഗം ആയി പ്രവേശനം നല്‍കാന്‍ ആ പള്ളികള്‍ തയ്യാറുമാണ്. അവനും കുടുംബവും കത്തോലിക്കാ വിശ്വാസികളായി ശിഷ്ട കാലം ജീവിച്ചു കൊള്ളും. നേരെ മറിച് ക്നാനായ സമുദായത്തില്‍ നിന്ന് തന്നെ പെണ്ണ് കെട്ടുന്നവരും കുടുംബവും സമുദായാംഗങ്ങളായി തുടരുകയും ചെയ്യും.

അമേരിക്കയില്‍ അന്യ സമുദായത്തില്‍ നിന്ന് വിവാഹം കഴിച്ച ക്നാനായക്കാര്‍ക്ക് അവിടുത്തെ ക്നാനായ മിഷനില്‍ അംഗങ്ങളായി തുടരാമെന്നാണത്രേ റോമില്‍ നിന്നുള്ള കല്പന. ആകട്ടെ, അതിലെന്താണിത്ര പുകില്‍. .

ഇത് ക്നാനായ സമുദായത്തെ എങ്ങനെ പ്രതികൂലമായി ബാധിക്കുമെന്നാണ്? അമേരിക്കയില്‍ നിന്ന് വിവാഹാലോചന വന്നിരുന്ന പഴയ കാലങ്ങളില്‍ ഒന്നും നോക്കാതെ എടുത്തു ചാടി വിവാഹം കഴിച്ചു വെട്ടില്‍ വീണവര്‍ തീരെ കുറവല്ല. അതോന്നും ഇത്തരം എന്ടോഗമസ് പ്രശ്നങ്ങളായിരുന്നില്ല, മറിച് രണ്ടാം കെട്ടും അതുപോലുള്ള മറ്റ് ചതികളും ആയിരുന്നു.

പിന്നെ അമേരിക്ക എന്ന് കേട്ടാല്‍ രണ്ടാമതൊന്നു കൂടി ആലോചിക്കണമെന്നായി. ഇപ്പോഴിതാ മൂന്നാമത്‌ ഒന്നുകൂടി ആലോചിക്കാന്‍ ഒരു കാരണം കൂടി. പക്ഷേ ക്നാനായക്കാര്‍ ഇതിനെ അതിജീവിക്കാന്‍ പ്രാപ്തരല്ലെന്നു ആരെങ്കിലും കരുതുന്നുണ്ടോ?

യു.കെ.കെ.സി.വൈ.എല്‍ . പഠന കളരി

2012-02-25T15:35:00.000-08:00

മദ്യത്തെക്കുറിച്ച് ഒരു സെമിനാര്‍ നടക്കുന്നു എന്നിരിക്കട്ടെ. മദ്യം മനുഷ്യനെ നശിപ്പിക്കുന്ന സാമൂഹ്യ വിപത്താണെന്നും സര്‍വ്വ രോഗങ്ങള്‍ക്കും കാരണം മദ്യമാണെന്നും അവിടെ ചര്‍ച്ച നയിക്കുന്നവര്‍ ഉന്നയിക്കും. കേട്ടിരിക്കുന്നവര്‍ മറു ചോദ്യം ചോദിച്ചു എന്ന് വരാം. അത് ഇതാണ്; പുരുഷന്മാര്‍ക്ക്‌ ദിവസം നാല് യൂണിറ്റും (നൂറു മില്ലി) സ്ത്രീകള്‍ക്ക് മൂന്ന് യൂണിറ്റും (എഴുപത്തിയഞ്ച് മില്ലി) മദ്യം അനുവദനീയമാണ്. ഇത് ഓരോ മദ്യക്കുപ്പിയുടെ ലേബലിലും വ്യക്തമാക്കിയിട്ടുണ്ട്. ശാസ്ത്രീയമായ പഠനങ്ങളുടെ വെളിച്ചത്തില്‍ മിതമായ മദ്യപാനം ആരോഗ്യപരമായ ജീവിതാവസ്ഥകള്‍ക്ക് പ്രതികൂലമല്ലെന്ന കണ്ടെത്തലുകളല്ലേ ഇത്തരം വെളിപ്പെടുത്തലുകള്‍ക്ക് പിന്നില്‍ ?

മദ്യപാനം പ്രോല്‍സാഹിപ്പിക്കാനല്ല ഇതെഴുതിയത്. ക്നാനായ സമുദായവും ചരിത്രവും സംബന്ധിച്ച് യു.കെ.കെ.സി.വൈ.എല്‍ . അംഗങ്ങള്‍ക്ക്‌ സംഘടിപ്പിച്ച പഠന കളരി കേള്‍ക്കാന്‍ ഇടയായി. യു.കെ.യില്‍ ഇന്ന് ജീവിക്കുന്ന ക്നാനായ യുവജനങ്ങള്‍ക്ക്‌ ദഹിക്കുന്ന വിവരണങ്ങളാണോ ഈ പഠന കളരികള്‍ നല്‍കുന്നത്? നൂറ്റാണ്ടുകള്‍ക്ക്‌ മുമ്പുള്ള ചരിത്രം. തെളിവുകളുടെ അഭാവം. കെട്ടിച്ചമച്ചതെന്ന കിംവദന്തി. ഇത്രയും പ്രതികൂല സാഹചര്യങ്ങളുള്ളപ്പോള്‍ ഈ ചരിത്രം അടുത്ത തലമുറയില്‍ അടിച്ചേല്‍പിക്കാന്‍ ശ്രമിക്കുന്നത് പണിയല്ലേ?

ആയിരത്തി തൊള്ളായിരത്തി അറുപതുകളിലും എഴുപതുകളിലും ജനിച്ച നമ്മുടെ തലമുറയേക്കാള്‍ എത്രയോ മുന്നിലാണ് ഇന്നത്തെ തലമുറ? ചരിത്രവും ഭൂമിശാസ്ത്രവും വിവര സാങ്കേതിക വിദ്യയും കലയും എല്ലാം വിരല്‍തുമ്പില്‍ അമ്മാനമാടുന്ന പുതു തലമുറയോട് പഴമ്പുരാണം വിളമ്പുന്നതില്‍ കഴമ്പുണ്ടോ? ഇവിടെ നമ്മള്‍ സ്വീകരിക്കേണ്ട നയം എന്താണ്? ഇത്തരം സമയം കൊല്ലി ഏര്‍പ്പാടുകളില്‍ നിന്നും മാറി, വര്‍ത്തമാന കാലത്തിന് അനുയോജ്യമായ രീതിയില്‍ സാധ്യമായ ബോധവല്‍ക്കരണത്തെക്കുറിച്ച് ചിന്തിക്കുന്നതാവില്ലേ ഉചിതം?

ചരിത്രം; അതെന്തുമാകട്ടെ. ഏഴ് ഇല്ലമോ, എഴുപത്തിരണ്ട് കുടുംബമോ, മൂന്ന് പായ്ക്കപ്പലോ, ക്നായി തോമയോ, ഉറഹാ മാര്‍ യൌസേഫോ, എഴുപത്തി രണ്ടു പദവികളോ, കൊടുങ്ങല്ലൂരോ, കടുത്തുരുത്തിയോ.... ഇന്നത്തെ തലമുറയ്ക്ക് നാം നല്‍കേണ്ട സന്ദേശം എന്താണ്? അത് വംശ ശുദ്ധി സംബന്ധിച്ചതാണ്. നിന്റെ ചരിത്രം എന്തുമായിക്കൊള്ളട്ടെ, ലോകത്തെവിടെയായാലും നീ ഒരു വംശമാണ്. സ്വവംശ വിവാഹം എന്നത് ക്നാനായക്കാരുടെ മാത്രം പ്രത്യേകതയല്ല. ലോകത്ത്‌ അനേകം ജാതി മത വിഭാഗങ്ങള്‍ നില നില്‍ക്കുന്നത്‌ വംശീയമായി തന്നെയാണ്. പിന്നെ ക്നാനായക്കാരന്‍ മാത്രം എന്തിനു വിമര്‍ശിക്കപ്പെടണം? ഈ ഒരു തലത്തില്‍ നിന്ന് കൊണ്ട് നമുക്ക്‌ നമ്മുടെ എന്ടോഗമിയെക്കുറിച് വരും തലമുറയ്ക്ക് അവബോധം നല്‍കരുതോ?

ക്ലാസുകള്‍ നയിക്കുന്നവരുടെ പാണ്ഡിത്യത്തെ ചോദ്യം ചെയ്യാനല്ല; മറിച്ച്, അത് ശ്രവിക്കുന്നവരുടെ മനോഗതം എന്താവും എന്ന ആശങ്കയില്‍ നിന്നാണ് ഇങ്ങനെയൊരു കുറിപ്പ്‌ ഉണ്ടായത്‌. ജനറേഷന്‍ ഗ്യാപ്പ് എന്നതിനേക്കാള്‍ വലിയ ഒരു ഗ്യാപ്പ്‌ ആണല്ലോ യു.കെ.യില്‍ നമ്മളും നമ്മുടെ മക്കളും തമ്മില്‍ . അവരെ ബോധവല്‍ക്കരിക്കണമെങ്കില്‍ പുതിയ സംവിധാനങ്ങളുടെ സഹായം നമ്മള്‍ തേടേണ്ടതുണ്ട്. അല്ലെന്നു വരികില്‍ നമുക്ക്‌ അഗ്രാഹ്യമായ കാര്യങ്ങളെക്കുറിച്ചുള്ള അവരുടെ ചോദ്യങ്ങളില്‍ തട്ടി വീഴുവാനുള്ള സാധ്യതയുമുണ്ട്.

ക്നാനായ സമുദായവും തെളിവ് ശേഖരണക്കാരും

2012-02-17T07:36:00.000-08:00

ക്നാനായ സമുദായത്തിന്റെ ഉത്ഭവവും ചരിത്രവും സംബന്ധിച്ച് ഭിന്നാഭിപ്രായങ്ങള്‍ ചില മാധ്യമങ്ങള്‍ റിപ്പോര്‍ട്ട് ചെയ്യുകയുണ്ടായി. സമുദായം ഉന്നയിക്കുന്ന ചരിത്രപരമായ തെളിവുകള്‍ പലതും വ്യാജമാണെന്നും പുരാവസ്തു ശേഖരങ്ങളില്‍ എവിടെയും കണ്ടെത്താനാവാത്തതാണെന്നും ചിലര്‍ സമര്‍ഥിക്കുന്നു. ക്നാനായക്കാരുടെ എഴുപത്തിരണ്ട് പദവികള്‍ സംബന്ധിച്ചും മറ്റുമാണ് ഇവര്‍ക്ക്‌ പരാതി. എന്നാല്‍ ബി.സി.നൂറ്റാണ്ടില്‍ തന്നെ കേരളവുമായി മധ്യപൂര്‍വദേശങ്ങള്‍ക്ക് വാണിജ്യപരമായി ബന്ധമുണ്ടായിരുന്നു എന്നതില്‍ ഇവര്‍ക്ക്‌ അഭിപ്രായ വ്യത്യാസമില്ല. ക്നായി തോമായോ മറ്റേതെങ്കിലും ഒക്കെ തോമാമാരോ വാണിജ്യപരമായി കേരളത്തില്‍ വന്നിരിക്കാം എന്നും ഇവര്‍ കരുതുന്നു.

"ഇക്കൂട്ടര്‍ കേരളത്തില്‍ ഇന്നും ശ്രദ്ധെയരായിരിക്കുന്നത് തികച്ചും ക്രൈസ്തവ വിരുദ്ധമെന്ന്തന്നെ വിശേഷിപ്പിക്കാവുന്ന വംശത്തനിമയില്‍ ഉള്ള വിശ്വാസവും സ്വവംശ വിവാഹനിഷ്ഠ എന്ന പ്രാകൃതാചാരത്തിലുള്ള പിടിവാശിയും കൊണ്ടാണ്" എന്ന് ഒരു ലേഖനം പറയുന്നു. ഇത് തന്നെയല്ലേ ക്നാനായക്കാരും പറയുന്നുള്ളൂ? സ്വവംശ വിവാഹനിഷ്ഠ പ്രാകൃതാചാരം തന്നെയാണ് ; ക്നാനായക്കാരെ സംബന്ധിച്ചും മറ്റാരെ സംബന്ധിച്ചും. ഇക്കാര്യത്തില്‍ പുരോഗമനപരമായ കീഴ്വഴക്കങ്ങള്‍ സമുദായത്തിന്റെ നിലനില്പിന് തന്നെ ഭീഷണിയാകുമെന്ന് മറ്റാരെക്കാളും നന്നായിട്ട് മനസ്സിലാക്കിയിട്ടുള്ളത് ക്നാനായക്കാര്‍ തന്നെയാണ്. അതുകൊണ്ട് കൂടിയാണ് പ്രാകൃതമോ പ്രാചീനമോ എന്തായാലും സ്വവംശ വിവാഹത്തില്‍ സമുദായാംഗങ്ങള്‍ ഉറച്ച നിലപാടുകള്‍ സ്വീകരിക്കുന്നത്. വംശ തനിമയില്‍ ഉള്ള വിശ്വാസം ക്രൈസ്തവ വിരുദ്ധമായി ക്നാനായ സമൂഹം ഇന്ന് വരെ കരുതിയിട്ടില്ല. മറ്റ് ക്രൈസ്തവ സഭകളോടോ വിശ്വാസികളോടോ ഒരിക്കല്‍ പോലും ക്നാനായക്കാര്‍ അസഹിഷ്ണുത പുലര്‍ത്തിയിട്ടില്ല.

ഒരു സമുദായത്തെക്കുറിച്ച് മനസ്സിലാക്കാന്‍ ഭൌമ ശാസ്ത്ര ഗവേഷണമോ പുരാവസ്തു ഗവേഷണമോ ആവശ്യമുണ്ടോ? ഇവിടെ എത്ര സമുദായങ്ങള്‍ക്കുണ്ട് ചരിത്രപരവും പുരാവസ്തു പരവുമായ പിന്‍ബലം? എന്താണ് ക്നാനായ സമുദായത്തിന്റെ വര്‍ത്തമാനകാല സ്വഭാവം? വിവാഹ ആഘോഷങ്ങളില്‍ ഒരു പ്രദേശത്തെ നാനാജാതി മതസ്ഥരുടെ പങ്കാളിത്തവും മദ്യസല്‍ക്കാരം ഉള്‍പ്പെടെയുള്ള കാര്യങ്ങളില്‍ ഇത്രയേറെ സോഷ്യലിസവും പരസ്യമായി പ്രകടിപ്പിക്കുന്ന മറ്റേത് സമുദായമാണ് കേരളത്തിലുള്ളത്? ലോകം മുഴുവനിലുമുള്ള ക്നാനായക്കാരെ പറ്റി അമിത മദ്യപാനികള്‍ എന്ന ദുഷ്കീര്‍ത്തി പരത്തിയിട്ടും സ്വന്തം കയ്യിലെ പണം മുടക്കി നാട്ടുകാര്‍ക്കും അയല്‍ക്കാര്‍ക്കും മദ്യസേവ നല്‍കുന്നതില്‍ സുഖം കണ്ടെത്തുന്ന ക്നാനായക്കാരന്‍ മറ്റുള്ളവരില്‍ നിന്നും ഒട്ടും വ്യത്യസ്തനല്ലെന്നാണോ?

ഒരു സാമാന്യ വ്യക്തിയെ സംബന്ധിച്ച് അപ്പന്‍, അമ്മ, വല്യപ്പന്‍, വല്യമ്മ, വല്യപ്പന്റെ അപ്പന്‍ ഇത്രയും പേരെക്കുറിച്ച് കണ്ടും കേട്ടും ഉള്ള അറിവുണ്ടായിരിക്കും. ഈ അറിവാണ് താന്‍ ഇന്ന സമുദായത്തില്‍ ഉള്ളവനാണെന്ന ബോധ്യം അവനു നല്‍കുന്നത്. അതിനു ചരിത്രപരമായ തെളിവുകളോ തെളിവില്ലായ്മയോ അവനു തടസമാകേണ്ടതില്ല. ആ സമുദായം ഉണ്ടായതിനോ നിലനിന്നതിനോ അവന്‍ ഉത്തരവാദി ആകുന്നില്ല. വിവാഹ പ്രായമാകുമ്പോള്‍ എവിടുന്നെങ്കിലും സ്വന്തം സമുദായത്തില്‍ നിന്ന് തന്നെ ഒരിണയെ കണ്ടെത്തിയാല്‍ , ഇഷ്ടപ്പെട്ടാല്‍ അവന്‍ വിവാഹം കഴിക്കുന്നത് സ്വാഭാവികം.

എഴുപത്തിരണ്ട് പദവികളും ആസ്വദിച്ച് ശ്രേഷ്ട ജീവിതം നയിച്ചവരാണ് ക്നാനായക്കാരുടെ മുന്‍തലമുറ എന്ന മണ്ടന്‍ ചിന്താഗതി ഇന്നത്തെ തലമുറയ്ക്ക് ഉണ്ടെന്നു സ്ഥിരബുദ്ധിയുള്ള ഒരു ക്നാനായക്കാരനും കരുതുകയില്ല. പ്രതികൂല സാഹചര്യങ്ങളില്‍ ജീവിതത്തെ എങ്ങനെ നേരിടണമെന്ന് സ്വന്തം ജീവിതം കൊണ്ട് ഒരു പക്ഷെ മേല്ജാതിക്കാരെയും കീഴ്ജാതിക്കാരെയും ഇടത്തട്ടുകാരെയും ഒരുപോലെ മനസ്സിലാക്കി കൊടുത്ത ഒരു സമൂഹം കൂടിയായിരിക്കും ക്നാനായക്കാരുടെത്. ഇതിന്റെ ജീവിക്കുന്ന തെളിവുകളാണ് കേരളത്തിലെ കുടിയേറ്റ ജില്ലകളിലും ലോകത്ത്‌ ആകമാനം ഉള്ള ആതുര ശുശ്രൂഷാ രംഗത്ത്‌ പ്രവര്‍ത്തിക്കുന്ന ക്നാനായ സാന്നിധ്യങ്ങളും.

ചിതലെടുത്ത ചരിത്ര സത്യങ്ങളെക്കാള്‍ ജീവിക്കുന്ന തെളിവുകളുടെ അപഗ്രഥ്നങ്ങളാകും കൂടുതല്‍ മിഴിവ് നല്‍കുന്നത്.

സാരഥികള്‍ മാറുമ്പോള്‍ ...

2012-01-31T10:09:00.001-08:00

യു.കെ.കെ.സി.എ. യുടെ പുതിയ ഭരണ നേതൃത്വം അധികാരമേറ്റെടുത്തു. കഴിഞ്ഞ നേതൃത്വം ഒരുപാട് വിമര്‍ശനങ്ങള്‍ ഏറ്റുവാങ്ങിയാണ് വിട വാങ്ങിയത്. ഇതില്‍ ഏറ്റവും കൂടുതല്‍ പരാമര്‍ശവിധേയമായത്‌ മത മേലധ്യക്ഷന്മാരോടും പുരോഹിതരോടുമുള്ള അവരുടെ അതിര് കവിഞ്ഞ വിധേയത്വവും ആശ്രിതത്വവുമാണ്. തങ്ങള്‍ക്ക് പരിഹരിക്കാന്‍ കഴിയുന്ന പ്രശ്നങ്ങളും വിഷയങ്ങളും ഉണ്ടാകുമ്പോള്‍ ഒന്നിച്ചു കൂടുകയും ചര്‍ച്ചയിലൂടെ പരിഹാരം കണ്ടെത്തുകയും ചെയ്യുക എന്നതാണ് സ്വാഭാവികമായും ഒരു ഭരണ സംവിധാനത്തില്‍ നിന്നും ജനം പ്രതീക്ഷിക്കുന്നത്. സാധാരണക്കാരായ സമുദായാംഗങ്ങളും ഇങ്ങനെ തന്നെ ചിന്തിക്കുന്നവരാണ്. അവര്‍ക്കും അച്ഛന്മാരോടും പിതാക്കന്മാരോടുമൊക്കെ സ്നേഹവും ആദരവും ഒക്കെയുണ്ട്.

സമുദായ സംഘടനകളുടെ നേതൃത്വം അലങ്കരിക്കുന്ന പലരുടെയും വിചാരം എന്തിനും ഏതിനും മത മേലധ്യക്ഷന്റെയോ പുരോഹിതന്റെയോ അനുമതി കൂടിയേ തീരൂ എന്നാണ്. ഈ നിലപാട് ജനാധിപത്യ വിരുദ്ധമാണ്. സമുദായാംഗങ്ങള്‍ നേരിടുന്ന പ്രശ്നങ്ങള്‍ രമ്യമായി പരിഹരിക്കപ്പെടണമെന്ന കാര്യത്തില്‍ വിരുദ്ധാഭിപ്രായം പുരോഹിതര്‍ക്കോ മേലധ്യക്ഷന്മാര്‍ക്കോ ഉണ്ടാവാനിടയില്ല. ഇതൊരു ഇടവകയല്ല; ഒരു ഇടവകയില്‍ സ്വാഭാവികമായും വൈദികന്റെ നിലപാടുകള്‍ അന്തിമമായി വരാറുണ്ട്, ഭൂരിപക്ഷ അഭിപ്രായം ഇല്ലെങ്കില്‍ കൂടി! യു.കെ.കെ.സി.എ.യില്‍ അംഗങ്ങളായിട്ടുള്ള സമുദായാംഗങ്ങള്‍ എല്ലാവരും ഒന്നിച്ചു കൂടുന്നത് സംഘടനയുടെ ആഭിമുഖ്യത്തില്‍ വര്ഷം തോറും സംഘടിപ്പിക്കാറുള്ള കണ്‍വന്‍ഷനുകളിലാണ്. സംഘടനയില്‍ അംഗങ്ങളല്ലാത്ത അപൂര്‍വം സമുദായാംഗങ്ങളും യു.കെ.യുടെ പല ഭാഗങ്ങളിലും ഇനിയും കണ്ടേക്കാം. സംഘടനയില്‍ അംഗങ്ങള്‍ അല്ലെന്നു കരുതി അവരാരും ക്നാനായക്കാരല്ലാതാകുന്നില്ല. അങ്ങനെയുള്ളവര്‍ക്കും നാട്ടില്‍ ഇടവകയും അച്ഛനും ഒക്കെയുണ്ട്. പിന്നെ മെത്രാന്‍; എല്ലാ സമുദായാംഗങ്ങള്‍ക്കും സമീപസ്ഥനായിരിക്കാന്‍ ഒരു മെത്രാനും കഴിയുകയില്ല. അതുകൊണ്ടാണ് അവര്‍ ജനങ്ങളുടെ പ്രതിനിധികളായി തെരഞ്ഞെടുക്കപ്പെടുന്നവരെ കാണുകയും കാര്യങ്ങള്‍ ആരായുകയും ഒക്കെ ചെയ്യുന്നത്. ഇത് സമുദായാംഗങ്ങള്‍ തെരഞ്ഞെടുക്കപ്പെടുന്നവര്‍ക്ക്‌ നല്‍കുന്ന ഔദാര്യവും അവകാശവുമാണ്.

രാഷ്ട്രീയക്കാരെ പോലെ ജനങ്ങളില്‍ നിന്നകന്ന് അധികാര കേന്ദ്രങ്ങളുമായി ഒട്ടി നിന്ന് ജന വിരുദ്ധ തീരുമാനങ്ങള്‍ നടപ്പിലാക്കാന്‍ ശ്രമിക്കുന്നത് ജനങ്ങള്‍ വച്ചുപൊറുപ്പിക്കില്ല. സ്വാഭാവികമായും ഇത്തരക്കാരുടെ നിലപാടുകള്‍ (അവരുടെതാണെങ്കില്‍ പോലും )വൈദികരുടെതെന്നു തെട്ടിദ്ധരിക്കാനും ഇടയുണ്ട്. അങ്ങനെ വിശ്വാസികളുടെ ദൃഷ്ടിയില്‍ വൈദികരും മെത്രാനും ഒക്കെ മോശക്കാരാകാനും ഇടയുണ്ട്. കഴിവുകെട്ട നേതൃത്വവും വ്യക്തിത്വമില്ലായ്മയും സത്യം പിന്തുടരുന്നതിലെ ചങ്കുറപ്പ് ഇല്ലായ്മയും ഒക്കെയാണ് ഇവിടെ വില്ലന്മാര്‍ . ആരൊക്കെ എന്തൊക്കെ പറഞ്ഞാലും ഒരു കാര്യത്തില്‍ വ്യക്തി പരമായി കഴിഞ്ഞ ഭരണ സമിതിയെ അനുമോദിക്കേണ്ടതുണ്ട്. യു.കെ.യില്‍ അങ്ങോളമിങ്ങോളം ഉള്ള സമുദായാംഗങ്ങളുടെ കുടുംബ വിവരം ഉള്‍പ്പെടുത്തി ഒരു ഡയറക്ടറി തയ്യാറാക്കിയതിനാണ് അത്. തിരക്കുകള്‍ക്കിടയിലും അങ്ങനെയൊരു ആശയം കണ്ടെത്തി പ്രാബല്യത്തില്‍ വരുത്തുവാന്‍ യത്നിച്ച ഏവരും അഭിനന്ദനം അര്‍ഹിക്കുന്നു. പുതിയ നേതൃത്വത്തിന് എല്ലാവിധ ഭാവുകങ്ങളും.

വിമര്‍ശനങ്ങളും സമുദായ വിരുദ്ധരും

2012-01-15T06:49:00.000-08:00

നൂറു കൊല്ലം മുമ്പ്‌ ക്നാനായക്കാര്‍ക്ക്‌ മാത്രമായി പ്രത്യേക വികാരിയാത്ത്‌ അനുവദിക്കുമ്പോള്‍ അതിന്റെ ഗുണ ഭോക്താക്കളായിരുന്ന ക്നാനായ കത്തോലിക്കാ വിശ്വാസികള്‍ ഏറെക്കുറെ മുഴുവനായും കേരളത്തിനുള്ളില്‍ തന്നെ ഉള്ളവരായിരുന്നു.

ഇന്നിപ്പോള്‍ കാലമേറെ കഴിഞ്ഞപ്പോള്‍ സമുദായമെന്ന നിലയില്‍ ഏറെ സാമ്പത്തികാഭിവൃദ്ധി നേടുകയും ലോകരാഷ്ട്രങ്ങളില്‍ എല്ലാം തന്നെ സജീവ സാന്നിധ്യമാകുകയും ചെയ്തതോട് കൂടി വിമര്‍ശനങ്ങള്‍ക്കും ഉല്‍ഭവം സംബന്ധിച്ച ചോദ്യം ചെയ്യലുകള്‍ക്കും വിധേയമാകേണ്ടിയും വരുന്നു എന്ന ദുര്യോഗവും ഈ സമുദായത്തിന്റെ മാത്രം പ്രത്യേകതയാണ്.

സമുദായത്തെ ഭേദ്യം ചെയ്യാന്‍ ശ്രമിക്കുന്ന ഇത്തരം ശക്തികള്‍ മറ്റ് സമുദായക്കാരോ ജാതികളോ അല്ല; പിന്നെയോ സ്വവംശ വിവാഹനിഷ്ഠ പാലിക്കാന്‍ കഴിയാതെ സമുദായത്തിന് വെളിയില്‍ നിന്ന് വിവാഹം കഴിച്ച സമുദായാംഗങ്ങളില്‍ ചിലര്‍ മാത്രമാണ്.

"ദാവീദ്‌ രാജാവിന്‍റെ കൊച്ചു മക്കള്‍ " എന്നും "രാജരക്ത "മെന്നും പഴമക്കാരായ ക്നാനായക്കാര്‍ നാഴികയ്ക്ക് നാല്പതു വട്ടം പുലമ്പിയിരുന്നില്ല. അങ്ങനെ പുലമ്പാന്‍ പറ്റുന്ന സാഹചര്യമായിരുന്നില്ല അവരുടേത്. മറ്റ് പല ജാതികള്‍ , കീഴ്ജാതിക്കാര്‍ ഉള്‍പ്പെടെയുള്ളവര്‍ ചെയ്തിരുന്ന കാര്‍ഷിക വൃത്തികളും അനുഭവിച്ചിരുന്ന ദാരിദ്ര്യവും നാന്നായിട്ടറിഞ്ഞു ജീവിച്ചവര്‍ ...

ഒരു സമുദായം എന്ന നിലയില്‍ സ്വവംശ വിവാഹം തുടരാന്‍ കഴിയുന്ന സാഹചര്യം നിലനിന്നിരുന്ന പ്രദേശമായിരുന്നു കേരളം. ജാതി വ്യവസ്ഥ ഇത്രയേറെ സങ്കീര്‍ണ്ണമായ ഒരിടം ഒരുപക്ഷെ ലോകത്ത്‌ മറ്റെവിടെയാനുള്ളത്? സ്വന്തമായി പള്ളികള്‍ ഇല്ലാതിരുന്നിട്ടും സ്വവംശ വിവാഹനിഷ്ഠ പാലിക്കാന്‍ ഇടയായതും അതിലൂടെ സമുദായം നിലനില്ക്കുന്നതിനും കാരണമായത് ഒരു പക്ഷെ ഈ ജാതി വ്യവസ്തയുടെ സഹായം കൊണ്ട് കൂടിയാണ് എന്നത് ആര്‍ക്ക് നിഷേധിക്കാനാകും?

ഇന്നിപ്പോള്‍ സഭയുടെയും രാജ്യത്തിന്‍റെയും നിയമങ്ങള്‍ അനുസരിച്ച് കേരളത്തിലെയും ഇതര സംസ്ഥാനങ്ങളിലെയും ക്നാനായ കത്തോലിക്കര്‍ (സ്വവംശ വിവാഹനിഷ്ഠ പാലിക്കുന്നവര്‍ )ഒരു സമുദായം എന്ന നിലയില്‍ തുടരാന്‍ യോഗ്യരാണ്. അന്യ സഭകളില്‍ നിന്ന് വിവാഹം കഴിക്കുന്നവര്‍ക്ക് അംഗത്വം നല്‍കുന്നതിന് ആ സഭകള്‍ എതിരല്ല താനും. എന്നാല്‍ അമേരിക്ക പോലുള്ള വ്യക്തിസ്വാതന്ത്ര്യം ഏറെയുള്ള രാജ്യങ്ങളില്‍ അങ്ങനെയാവണമെന്നില്ല.

അവിടുത്തെ സിവില്‍ നിയമങ്ങളുടെ ചുവടു പിടിച്ച്, അന്യ സഭകളില്‍ നിന്ന് വിവാഹം ചെയ്ത ക്നാനായക്കാര്‍ ക്നാനായ മിഷനുകളില്‍ അംഗത്വത്തിന് ശ്രമിക്കുന്നു എന്നത് സാങ്കേതികമായി അവിടെ ചില പ്രതിസന്ധികള്‍ സൃഷ്ടിചിരിക്കാം. ഇതിനെ പ്രതിരോധിക്കാനുള്ള ശ്രമങ്ങളാകട്ടെ തീവ്ര വൈകാരികതയുടെയും ...

പള്ളികള്‍ക്കെന്നതുപോലെ മെത്രാന്മാര്‍ക്കും അച്ഛന്മാര്‍ക്കും ഒക്കെ അവരുടേതായ പ്രസക്തി തീരെ കുറവല്ലാത്ത ഒരു സമുദായമാണ് ക്നാനായക്കാരുടെത്. എന്നാല്‍ സമുദായത്തിന്‍റെ ഭാവി സുരക്ഷിതമാണോ എന്ന ചിന്തയ്ക്ക് തീരെ പ്രസക്തിയില്ലായ്കയില്ല. വിദേശങ്ങളില്‍ പ്രത്യേകിച്ചും.

ഇന്നത്തെ കുട്ടികളിലാണ് സമുദായത്തിന്‍റെ ഭാവി എന്നതില്‍ തര്‍ക്കമില്ല. പണ്ട് മാതാപിതാക്കള്‍ പറഞ്ഞതനുസരിച്ച് ജീവിതാന്തസ് തെരഞ്ഞെടുക്കുകയും ജീവിത പന്കാളിയെ കണ്ടെത്തുകയും ചെയ്തിരുന്ന പ്രവണതയും രീതിയും മാറി വരികയാണ്. സ്വവംശവിവാഹനിഷ്ഠ കര്‍ക്കശമായി പാലിക്കുന്ന ഒരു സമുദായം എന്ന നിലയില്‍ ക്നാനായ സമുദായം അഭിമുഖീകരിക്കുന്ന ഈ വെല്ലുവിളി വിദേശങ്ങളില്‍ മറ്റേതൊരു മലയാളി സമൂഹവും അനുഭവിക്കുന്നുമുണ്ട്.

പ്രായപൂര്‍ത്തിയായ കുട്ടികള്‍ വിവാഹം വേണ്ടെന്നു വയ്ക്കുന്നതും ഇഷ്ടപ്പെട്ട ജീവിത പങ്കാളികള്‍ക്കൊപ്പം (അവരുടെ ജാതിയും മതവും വര്‍ണ്ണവും നോക്കാതെ) ജീവിക്കാന്‍ തീരുമാനിക്കുന്നതും തീര്‍ച്ചയായും ചര്‍ച്ച ചെയ്യപ്പെടേണ്ട വിഷയങ്ങളാണ്.

പള്ളികളും പരമ്പരാഗത വിശ്വാസ പരിശീലനങ്ങളും ഇക്കാര്യത്തില്‍ വേണ്ടത്ര വിജയിക്കുന്നുണ്ടോ എന്ന് പരിശോധിക്കേണ്ടിയിരിക്കുന്നു. ഇതിനെതിരെ ഉയരുന്ന വിമര്‍ശനങ്ങള്‍ അതാണ്‌ സൂചിപ്പിക്കുന്നത്. സമുദായത്തിന്റെ ഭാവി സംബന്ധിച്ച ഇത്തരം വിഷയങ്ങളില്‍ ആരോഗ്യപരമായ ചര്‍ച്ച ഉണ്ടായി കാണുന്നില്ല.

ഏതെന്കിലും കോണുകളില്‍ നിന്ന് ഒറ്റപ്പെട്ട ചില വിമര്‍ശനങ്ങള്‍ ഉയരുമ്പോള്‍ അതിനെ സഭാവിരുദ്ധമായും സമുദായ വിരുദ്ധമായും ചിത്രീകരിക്കുന്ന പ്രവണത അവസാനിപ്പിക്കെണ്ടതുണ്ട്. സമുദായവിരുദ്ധര്‍ ഉന്നയിക്കുന്ന വിഷയങ്ങളും ആവലാതികളും മറ്റ് പലതാണ്.

സമുദായ സംഘടനകള്‍ക്ക്‌ ഇക്കാര്യത്തില്‍ ചെറുതല്ലാത്ത പങ്കാണുള്ളത്. ദൌര്‍ഭാഗ്യവശാല്‍ പലപ്പോഴും അവര്‍ക്കതിന് കഴിയാറില്ല. ഹൃസ്വവീക്ഷണം ഉള്ളവരില്‍ നിന്ന്ദീര്‍ഘ വീക്ഷണം ഉള്ളവരായി സംഘടനാംഗങ്ങളും നേതാക്കളും മാറേണ്ടിയിരിക്കുന്നു. പുരോഹിതരോടും തിരുമേനിമാരോടും ഉള്ളതിനേക്കാള്‍ അവര്‍ക്ക്‌ കടപ്പാട് സാധാരണക്കാരായ സമുദായാംഗങ്ങളോടും അവരുടെ കുടുംബാംഗങ്ങളോടും ആണ് ഉണ്ടാവേണ്ടത്. അതിനര്‍ത്ഥം അവരെ ഗൌനിക്കരുതെന്നോ, ബഹുമാനിക്കരുതെന്നോ അല്ല; അത് മാത്രമായി പോയതിന്റെ ഭവിഷ്യത്തുകള്‍ ആണ് നാമിന്നിവിടെ കണ്ടുകൊണ്ടിരിക്കുന്നത്.

റാസല്‍ ഖൈമ

2011-09-03T13:54:00.000-07:00

യു.എ.ഇ.യിലെ പ്രശസ്തമായ തൊഴിലിടമാണ് റാസല്‍ഖൈമ. അനേകം മലയാളികള്‍ വര്‍ഷങ്ങളായി വിദേശനാണ്യം നേടി ജീവിതം കരുപ്പിടിപ്പിച്ച ഒരിടം. അവിടെ ഒരു മലയാളി കുടുംബം ആത്മഹത്യ ചെയ്ത നിലയില്‍ കണ്ടെത്തിയതായി വാര്‍ത്ത. ഭാര്യയും ഭര്‍ത്താവും എട്ടു വയസ്സ് പ്രായമുള്ള മകളും. മൂവരും തൂങ്ങി മരിച്ച നിലയില്‍ . ഭാര്യ ഗര്‍ഫിണിയാണെന്നും റിപ്പോര്‍ട്ട്. അങ്ങനെയെങ്കില്‍ മരണം നാല്.

വാര്‍ത്താ ഗുളികകള്‍ പരമാവധി കുത്തി നിറയ്ക്കുന്ന ഓണലൈന്‍ പത്രങ്ങളിലൂടെ കണ്ണോടിച്ചപ്പോള്‍ കണ്ട മാത്രയില്‍ നോക്കിയത് ഈ ദുരന്ത വാര്‍ത്ത. സഹായം തേടിയും അല്ലാതെയും പല വാര്‍ത്തകള്‍ ലോകത്തിന്‍റെ പല ഭാങ്ങളില്‍ നിന്നും ദിനം പ്രതിയെന്നോണം വരും. സഹായം അടിയന്തിരമായി അര്‍ഹിക്കുന്നവര്‍ക്ക് പോലും വിധവയുടെ കൊച്ചു കാശ് പോലും നല്‍കാന്‍ കഴിവില്ലാതെ പ്രവാസ ജീവിതം നയിക്കുന്നവരാണ് പ്രവാസികളിലധികവും. എന്നിട്ടും നാട്ടില്‍ കഷ്ടതയനുഭവിക്കുന്ന ജനവിഭാഗങ്ങള്‍ക്ക് തങ്ങളാല്‍ കഴിയുന്ന സഹായം നല്‍കുന്നതില്‍ ഉല്‍സുകരാണു ഓരോ പ്രവാസിയും. ഏഷ്യനെറ്റിന്റെ "കണ്ണാടി" പോലുള്ള പരിപാടികളില്‍ ഇത് വളരെ പ്രകടമാണ്.

റാസല്‍ ഖൈമയില്‍ മരണം വരിച്ച കുടുംബം ആരോടും പരിഭവം പറഞ്ഞില്ല. നമ്മളാരും അതൊട്ടറിഞ്ഞുമില്ല. റാസല്‍ ഖൈമയില്‍ നിന്ന് തന്നെ എത്ര വിദേശ നാണയം കേരളത്തിലേക്ക്‌ ഒഴുകിയിരിക്കുന്നു; കഷ്ടതയനുഭവിക്കുന്ന മലയാളികളുടെ സാന്ത്വനത്തിനായി. പക്ഷേ അവിടെയുള്ള മലയാളി കുടുംബത്തിനു കടക്കെണിയില്‍ നിന്ന് മോചനം വേണമെങ്കില്‍ ആത്മഹത്യ അല്ലാതെ വേറെ വഴിയില്ലാതായിരിക്കുന്നു!

ട്രെയിലര്‍ സര്‍വ്വീസ്‌ നടത്തി വരികയായിരുന്ന ഗൃഹനാഥന്‍ അപ്രതീക്ഷിതമായി കടക്കെണിയിലായതാണ് ഇത്തരം ഒരു ദുരന്തത്തിലേക്ക്‌ ഈ കുടുംബത്തെ നയിക്കാന്‍ പ്രേരിപ്പിച്ചതെന്ന് വേണം കരുതാന്‍.

സംഭവിച്ച ആ ദുരന്തത്തിന് ഇനി പ്രതിവിധിയില്ല.

കേന്ദ്ര മന്ത്രിമാരില്‍ വരുമാനം തീരെ കുറവ്‌ പ്രതിരോധമന്ത്രി എ.കെ. ആന്‍റനിക്കാനത്രേ! കേരളാ മുഖ്യ മന്ത്രി ഉമ്മന്‍ ചാണ്ടിക്ക് മുപ്പതിനായിരം രൂപയുടെ സമ്പാദ്യം മാത്രം!

മറ്റു വാര്‍ത്താ ഗുളികകളില്‍ കണ്ടത്‌..

ശതാബ്ദി പിന്നിട്ട് കോട്ടയം അതിരൂപത

2011-08-30T10:22:00.000-07:00

കോട്ടയം രൂപത സ്ഥാപിതമായതിന്റെ നൂറാം വാര്‍ഷികം അത്യാര്ഭാടപൂര്‍വ്വം കൊണ്ടാടി. സമുദായാംഗങ്ങള്‍ സ്ത്രീ-പുരുഷ, പ്രായഭേദമെന്യേ അവരുടെ സജീവ സാന്നിധ്യം നല്‍കി കോട്ടയം നഗരത്തില്‍ നടന്ന റാലിയെ സമ്പുഷ്ടമാക്കി. പ്രാദേശിക രാഷ്ട്രീയ പാര്‍ട്ടികള്‍ തങ്ങളുടെ ശക്തി തെളിയിക്കുന്നതിനായി ഇടയ്ക്കിടെ സംഘടിപ്പിക്കാറുള്ള വീഥികളിലൂടെയാണ് റാലി ക്രമീകരിച്ചിരുന്നത്. ചെറുതും വലുതുമായ രാഷ്ട്രീയ പാര്‍ട്ടികള്‍ ശക്തി പ്രകടനങ്ങള്‍ക്ക്‌ ദിവസക്കൂലിക്ക് ആളെ സംഘടിപ്പിക്കുന്ന സാഹചര്യത്തിലാണ് ആബാല വൃദ്ധം ക്നാനായ മക്കള്‍ ഒന്നടങ്കം പങ്കെടുത്തു കൊണ്ട് റാലിയെ ചരിത്രമാക്കിയത്‌.

ക്നാനായ വികാരം എന്താണെന്നുള്ളതിന്റെ നിര്‍വചനം കൂടിയാണ് റാലിയിലെ ഈ ജനപങ്കാളിത്തം കൊണ്ട് അര്‍ത്ഥമാക്കുന്നത്. നൂറ്റാണ്ടുകള്‍ പഴക്കമുള്ള ക്നാനായ കുടിയേറ്റത്തിനു വസ്തുതാ പരമായ തെളിവുകള്‍ തേടി അലയുന്ന ക്നാനായ വിരുദ്ധരും (സ്വവംശ വിവാഹ നിഷ്ഠ തെറ്റിച്ച ചുരുക്കം ക്നാനായക്കാരാണിക്കൂട്ടര്‍ എന്നതാണ് രസാവഹം) സിരകളില്‍ ഒഴുകുന്നത് രാജരക്തം എന്ന് നാഴികയ്ക്ക് നാല്പതു വട്ടം വിളംബരം ചെയ്യുന്ന ക്നാനായ തീവ്രവാദികളും ഒരേപോലെ ആത്മശോധന ചെയ്യേണ്ട ചില വസ്തുതകളുണ്ട്.

ക്നാനായ സമുദായത്തെ ലോകത്തിലെ എട്ടാമത്തെ അത്ഭുതമായിട്ടു വിശേഷിപ്പിച്ച സമുദായാംഗങ്ങളല്ലാത്ത ചില വൈദിക ശ്രേഷ്ടരുണ്ട്. സമുദായം സംഘടിപ്പിച്ച വിശേഷാവസരങ്ങളില്‍ പങ്കെടുത്തു പ്രസംഗിക്കുമ്പോള്‍ കാട്ടുന്ന സുഖിപ്പിക്കല്‍ എന്നതിനപ്പുറം ഗൗരവമായി ഏതെന്കിലും ക്നാനായക്കാരന്‍ അത്തരം പ്രസ്താവനകളെ മുഖവിലയ്ക്കെടുക്കുമെന്നു കരുതുക പ്രയാസമാണ്.

റോമന്‍ കത്തോലിക്കാ സഭയ്ക്ക് കീഴില്‍ അതിരൂപതയായി തുടരുമ്പോഴും ലോകത്താകമാനമുള്ള നാല്‍പതിനായിരം വരുന്ന ക്നാനായ കത്തോലിക്ക വിശ്വാസികള്‍ക്ക് അവരായിരിക്കുന്ന ഇടങ്ങളില്‍ സ്വന്തം രൂപത എന്ന ആശയത്തിനു പഴക്കമേറെയുണ്ട്. സഫലീക്രുതമാകാന്‍ വൈകുന്ന ഈ രൂപതകളെ സംബന്ധിച്ച അതിരൂപതയുടെ പ്രഥമ മെത്രാപ്പോലീത്തയുടെ വാക്കുകള്‍ ഏതൊരു ക്നാനായകാരനിലും നൊമ്പരം ഉണര്‍ത്താന്‍ പര്യാപ്തമാണ്.

ഇതൊന്നുമില്ലെന്കിലും ക്നാനായക്കാരന്‍ ക്നാനയക്കാരനായിട്ടു തന്നെ ജീവിക്കും. ക്നാനായക്കാരന്റെ നൂറു വര്ഷം മുമ്പ്‌ വരെയുള്ള ജീവിതമാണ് അതിനു തെളിവ്‌. അഷ്ടിക്കു വക തേടി സ്വന്തം കുടുംബം വിട്ട് പരദേശവാസം നടത്തിയവരുടെ പിന്മുറക്കാരാണ് ഇന്നത്തെ ക്നാനായക്കാര്‍. പള്ളിയും പട്ടക്കാരനും പോയിട്ട് മനുഷ്യ വാസം പോലുമില്ലാത്ത ഇടങ്ങളില്‍ കടന്നു ചെന്ന് വന്യജീവികളോട് പോരുതിയും കാടും മലയും വെട്ടി തെളിച്ച് കൃഷി ചെയ്തു ഉപജീവനം നിര്‍വഹിച്ച ഒരു ജനത.

അതിജീവിച്ചു എന്ന് പറയുമ്പോള്‍ പൂര്‍ണ്ണമായും അതിജീവിച്ചു എന്ന് അര്‍ത്ഥമാക്കുന്നത് ശരിയല്ല. ഒരു ചെറു ന്യൂനപക്ഷം എങ്കിലും പലയിടങ്ങളില്‍ പല നാളുകളില്‍ പട്ടു പോയിയിട്ടുണ്ടാവും തീര്‍ച്ച! അവരെക്കുറിച്ച് ആരോര്‍ക്കുന്നു? ഇവരെക്കൂടാതെ സ്വയം കൃതാനര്‍ത്ഥം കൊണ്ട് സമുദായത്തിന് വെളിയിലായവര്‍ കേരളത്തിലാണ് ഏറ്റവും കൂടുതല്‍. അവരാരും ഏതെന്കിലും രീതിയില്‍ സമുദായത്തോട് ഏറ്റുമുട്ടിയതായി അറിവില്ല; പകരം സ്വന്തം സുഖം തേടി വിദേശ രാജ്യങ്ങളില്‍ എത്തിപ്പെട്ട സ്വവംശ വിവാഹ നിഷ്ഠ പാലിക്കാന്‍ മറന്നു പോയ ക്നാനായകാരാണ് സമുദായത്തിന്റെ സ്വാഭാവിക വളര്‍ച്ചയ്ക്ക് വിഘാതമായിട്ടുള്ളത്.

ഇവരോട്‌ ഏറ്റുമുട്ടുന്നതാകട്ടെ, ക്നാനായ തീവ്രവാദികളും! ഈ രണ്ടു വിഭാഗങ്ങളെയും അനുനയിപ്പിക്കുക എന്നതാണ് ക്നാനായ സമുദായം ഈ ശതാബ്ദി വര്‍ഷത്തില്‍ നേരിടുന്ന ഏറ്റവും വലിയ വെല്ലുവിളി.

കവിയല്ലാത്തവന്റെ കവിത

2011-08-27T13:18:00.000-07:00

ജനാലയില്‍ നോക്കി ഞാന്‍ നിന്നത് കവിത എഴുതണമെന്നു കരുതിയല്ല

ഒരു ചിലന്തിയാണെന്റെ ശ്രദ്ധയെ ജനാലയിലെക്കടുപ്പിച്ചത്

വെറും ചിലന്തിയല്ല; വിശന്നു വലഞ്ഞ് ഇരയെ കാത്തിരുന്ന ചിലന്തി

ഞാന്‍ കാണുമ്പോള്‍ വലയില്‍ ഒരു ഇര കുടുങ്ങിയിട്ടുണ്ട്

ഇരയെന്നു പറഞ്ഞാല്‍ ഒരു ചെറു പ്രാണി.

ആസന്ന മരണത്തില്‍ നിന്ന്‍ പറന്നകലാന്‍

വിഫല ശ്രമം നടത്തുന്ന പ്രാണി.

ഇതെങ്ങനെയും ക്യാമറയില്‍ പകര്‍ത്തണം;

മരണം അരികെ; വിശപ്പില്‍ നിന്നുള്ള മോചനവും

എന്ന് ക്യാപ്ഷനും നല്‍കി പ്രസിദ്ധീകരിക്കാം

ക്യാമറ കണ്ടെത്തി ബാറ്ററി ലോഡു ചെയ്യുമ്പോള്‍

എന്റെ കൈ വിറയ്ക്കുന്നു; ചിലന്തിയും ഇരയും

തമ്മില്‍ അകലം തീരെ ഇല്ലാതെയാകുന്നു.

ക്യാമറ ഫോക്കസ്‌ ചെയ്ത് ക്ലിക്ക്‌ ചെയ്യാന്‍ നോക്കുമ്പോള്‍

ഇരയവിടെയില്ല ചിലന്തി മാത്രം

തിന്നു തൃപ്തനായ ചിലന്തി മാത്രം

പറന്നകലാമെന്ന ഇരയുടെ മോഹം പോലെ

എന്‍റെ ചിത്ര സങ്കല്പവും വേട്ടയാടപ്പെട്ടു

ഞാന്‍ ക്യാമറ വലിച്ചെറിഞ്ഞു ചിന്തിച്ചു

എനിക്ക് വേണമെങ്കില്‍ ആ ഇരയെ രക്ഷപെടുത്താമായിരുന്നു

അപ്പോഴും എനിക്ക് നഷ്ടം തന്നെ; വിശന്നിരിക്കുന്ന ചിലന്തിക്കും

ഇപ്പോള്‍ നഷ്ടം എനിക്ക് മാത്രം

നഷ്ടത്തെക്കുറിച്ച് ചിന്തിക്കാന്‍ ഇര ഇന്ന് ജീവിചിരിപ്പില്ലല്ലോ?

ദൈവങ്ങളുടെ സ്വന്തം നാടും അമേരിക്കയും

2011-08-25T04:29:00.000-07:00

അമേരിക്ക കടുത്ത സാമ്പത്തിക പ്രതിസന്ധിയിലേക്ക്‌ കൂപ്പു കുത്തുകയാണത്രേ! സാമ്പത്തിക ശാസ്ത്രത്തില്‍ വൈദഗ്ധ്യമുള്ളവരും അല്ലാത്തവരും കാര്യ കാരണങ്ങള്‍ സഹിതം മാധ്യമങ്ങളിലൂടെ ഇത്‌ വിശദമാക്കാന്‍ ശ്രമിക്കുന്നു. പൊതു കടം, കടപത്രം, ഓഹരി വിപണി, മൂലധനം, തുടങ്ങി ഒരു രാജ്യത്തിന്റെ സാമ്പത്തിക ഘടനയെ നേരിട്ട് ബാധിക്കുന്ന അനേകം ഘടകങ്ങള്‍ക്ക്‌ ഇന്ന് അമേരിക്കയില്‍ പ്രതികൂല സാഹചര്യമാണത്രേ ഉള്ളത്. പോരാത്തതിന് യുദ്ധം വരുത്തി വച്ച അധിക ബാധ്യതയും.

പരമ്പരാഗതമായി അമേരിക്ക സ്വന്തം താല്പര്യങ്ങള്‍ സംരക്ഷിക്കുന്നതില്‍ ശുഷ്കാന്തിയുള്ള ഒരു രാഷ്ട്രമായിരുന്നു. അമേരിക്കയുടെ നേതൃത്വത്തില്‍ നടന്ന പല യുദ്ധങ്ങളും അവരുടെ ഇംഗിതം ലക്ഷ്യമാക്കി മാത്രം വിഭാവന ചെയ്യപ്പെട്ടവയാണ്. ഇത്തരം യുദ്ധങ്ങളിലൂടെ അവര്‍ ലക്ഷ്യമിട്ടതും ആ രാജ്യങ്ങളിലെ പ്രകൃതി വിഭവങ്ങളോ അസംസ്കൃത വസ്തുക്കളോ ഒക്കെ തന്നെയായിരുന്നു.

സ്വന്തം കഴിവുകള്‍ കൊണ്ടും ശാസ്ത്ര സാങ്കേതിക രംഗങ്ങളിലെ മികവുകള്‍ കൊണ്ടും ലോക രാഷ്ട്രങ്ങളില്‍ ഒന്നാമന്‍ എന്ന ഖ്യാതി നേടിയ പരമ്പരാഗത രാഷ്ട്രത്തിനാണ് ഇന്നീ ദുര്യോഗമെന്നോര്‍ക്കണം.

അമേരിക്കന്‍ ഐക്യ നാടുകള്‍ ആനയാണെങ്കില്‍ നമ്മുടെ കൊച്ചു കേരളം രൂപീക്രുതമാകുന്നതിനു മുമ്പുള്ള തിരുവിതാംകൂര്‍ വെറും അണ്ണാനാണ്. ലോക യുദ്ധം പോയിട്ട് മറ്റ് നാട്ടു രാജ്യങ്ങളായിട്ട് പോലും വഴക്കിനും വയ്യാവേലിക്കും മുതിരാതെ സമാധാനത്തില്‍ കഴിഞ്ഞു കൂടിയ ഒരു കൊച്ചു രാജ്യവും അതിലെ ദരിദ്രരായ പ്രജകളും!

ഈ പ്രജകളുടെ പിന്മുറക്കാര്‍ ഇന്ന് അമേരിക്കയില്‍ മാത്രമല്ല; ലോകത്തിന്റെ മുക്കിലും മൂലയിലും അരികിലും എല്ലാമുണ്ട്. ഇവര്‍ക്ക്‌ കിട്ടിയ വിദേശ നാണയം നമ്മുടെ കൊച്ചു കേരളത്തെ ഇത്രയുമെങ്കിലും വികസിപ്പിക്കാന്‍ തെല്ലൊന്നുമല്ല സഹായിച്ചിട്ടുള്ളത്.

അങ്ങനെയിരിക്കുമ്പോഴാണ് മലയാളിയെ എന്നല്ല; സാക്ഷാല്‍ അമേരിക്കയെ പോലും ഞെട്ടിക്കുന്ന തരത്തില്‍ ശ്രീ പദ്മനാഭ സ്വാമി ക്ഷേത്രത്തില്‍ സൂക്ഷിച്ചിരുന്ന നിധിയെക്കുറിച്ചുള്ള വാര്‍ത്ത പുറത്തു വരുന്നത്.

വലുപ്പ ചെറുപ്പം അവിടെ നില്‍ക്കട്ടെ; ഇത് രണ്ടു രാജ്യങ്ങളും അവിടുത്തെ പ്രജകളും തമ്മില്‍ നൂറ്റാണ്ടുകളായി തുടരുന്ന വൈരുദ്ധ്യങ്ങളിലെക്ക് കൂടിയാണ് വിരല്‍ ചൂണ്ടുന്നത്. എങ്ങനെയും സമ്പത്ത്‌ സ്വരൂപിക്കുകയും ആര്‍ഭാടപൂര്‍വ്വം ജീവിതം ആസ്വദിക്കുകയും ചെയ്യുന്ന സമൂഹം ഒരു വശത്ത്. ദാരിദ്ര്യത്തിന്റെ കൊടുമുടികളില്‍ കഴിയുമ്പോഴും ദൈവത്തിനും ആരാധനാലയങ്ങള്‍ക്കും പണമായും പണ്ടമായും ദാനം ചെയ്തു സ്വന്തം ദാരിദ്ര്യത്തിനു കൂടുതല്‍ ഊക്കും മിഴിവും നല്‍കിയ മറ്റൊരു സമൂഹം മറുവശത്തും!

അമേരിക്കയിലെ ഏതെങ്കിലും ദൈവാലയത്തില്‍ ഇങ്ങനെ ഒരു നിധി ശേഖരം സ്വപ്നം കാണാന്‍ കഴിയില്ല. ആരാധനാലയങ്ങള്‍ മറ്റു സ്വകാര്യ സ്ഥാപനങ്ങള്‍ പോലെ സര്‍ക്കാര്‍ നിയന്ത്രണത്തിലും നിരീക്ഷണത്തിലുമാണെന്നതായിരിക്കാം ഒരു കാരണം. മറ്റൊന്ന്‍; വിശ്വാസികളുടെ നിലപാടുകളാണ്. അമേരിക്കയിലെ ജനങ്ങള്‍ കാലങ്ങളായി ആരാധനാലയങ്ങളെയും മതാനുഷ്ടാനങ്ങളെയും അന്ധമായി പിന്തുടരുന്നതില്‍ വൈമുഖ്യമുള്ളവരാണ്. അവരുടെ ആരോഗ്യവും സാമൂഹ്യ സുരക്ഷയും സര്‍ക്കാരില്‍ നിക്ഷിപ്തമാണെന്നുള്ള ഉറപ്പായിരിക്കാം ഈ വൈമുഖ്യത്ത്തിനു പിന്നില്‍.

മറ്റെല്ലാ സമൂഹത്തിനുമെന്നതുപോലെ അവിടുത്തെ മലയാളി സമൂഹത്തിനും സര്‍ക്കാറിന്റെ ഈ സുരക്ഷാ സംവിധാനങ്ങള്‍ ലഭ്യമാണ്. ഇക്കൂട്ടര്‍ക്ക്‌ ആരാധനാലയങ്ങളോടും അനുഷ്ടാനങ്ങളോടും വൈമുഖ്യമില്ലെന്നു മാത്രമല്ല; തീവ്രമായ ഒരഭിനിവേശം കൂടി ഉണ്ടെന്നതിന്റെ പ്രത്യക്ഷ ഉദാഹരണമാണ് വര്‍ധിച്ചു വരുന്ന പള്ളി വാങ്ങലുകളും അതേതുടര്‍ന്നുള്ള വിവാദങ്ങളും.

കേരളം ദാരിദ്ര്യത്തിന്റെ കൊടുമുടിയിലായിരുന്നപ്പോഴും അമേരിക്കയില്‍ കഴിയാന്‍ ഭാഗ്യം സിദ്ധിച്ച മലയാളികളുണ്ട്. അമേരിക്ക സാമ്പത്തിക തകര്‍ച്ചയിലേക്ക് കൂപ്പു കുത്തുമ്പോഴും അനേകം മലയാളികള്‍ അവിടെ സ്വന്തം ഭാവി കരുപ്പിടിപ്പിക്കുന്നതിന്റെ തിരക്കിലാണ്. കൈയ്യില്‍ കുറെ ഡോളറുമായി കേരളത്തില്‍ പണ്ടു ചെന്നിറങ്ങുന്നതും ഇന്നിറങ്ങുന്നതുമായി ആനയും അണ്ണാനും പോലുള്ള വ്യത്യാസമുണ്ട്.

സാമ്പത്തിക ശാസ്ത്രത്തിന്റെ സൂത്രവാക്യങ്ങള്‍ മനസിലാകാത്തവര്‍ക്കും ചില സാമ്പത്തിക സത്യങ്ങള്‍ മനസിലാക്കാന്‍ പര്യാപ്തമാണ് ഈ വ്യത്യാസം. ഇന്ത്യ സാമ്പത്തികമായ കുതിപ്പിലാണെന്നും അമേരിക്കയും അതുപോലുള്ള വികസിത രാജ്യങ്ങളും വളര്‍ച്ച മുരടിച്ച അവസ്ഥയിലുമാണെന്നതാണ് ആ സത്യം.

2011-07-26T15:05:00.000-07:00

യു.കെ.യിലെ ഏറ്റവും വലിയ ബഹുജന കൂട്ടായ്മയായി യു.കെ.കെ.സി.എ. കണ്‍വന്‍ഷന്‍ കരുതപ്പെടുകയും മാധ്യമങ്ങള്‍ കൊണ്ടാടുകയും ചെയ്യുന്നു എന്നുള്ളത് ഏതൊരു ക്നാനായക്കാരനും അഭിമാനിക്കാന്‍ വക നല്‍കുന്നു. ക്നാനായ ഐക്യം, ശക്തി, ജനപങ്കാളിത്തം ഇതെല്ലാം വിളിച്ചോതിയ പത്താമത് കണ്‍വന്‍ഷന്‍ ഭംഗിയാക്കാന്‍ പരിശ്രമിച്ച എല്ലാവരും അഭിനന്ദനം അര്‍ഹിക്കുന്നു.

റാലികളിലെ ജനക്കൂട്ടം എന്നതിലുപരിയായി സമുദായാംഗങ്ങള്‍ക്ക്‌ എന്തെങ്കിലും പ്രസക്തി ഉള്ളതായി ആരും എവിടെയും പറഞ്ഞു കേള്‍ക്കാറില്ല. അവധിയെടുത്തും ദീര്‍ഘദൂരം യാത്ര ചെയ്തും കുട്ടികളും കൈക്കുഞ്ഞുങ്ങളുമായി കണ്‍വന്‍ഷനില്‍ എത്തിച്ചേര്‍ന്ന ആയിരക്കണക്കിന് സമുദായാംഗങ്ങളുടെ ആത്മാര്‍ത്ഥതയ്ക്ക് അനല്പമായ അഭിവാദ്യങ്ങള്‍...

2010-09-14T03:22:00.000-07:00

ഭാസ്കര പട്ടേലര്മാരും തൊമ്മിയും ...

വിവാഹം എന്നത് ക്രൈസ്തവ സഭയ്ക്ക് ഒരു കൂദാശയാണ് . മനുഷ്യന്റെ അടിസ്ഥാന ആവശ്യങ്ങളില്‍ ഒന്നായ ലൈംഗികത യഥേഷ്ടം ആസ്വദിക്കുന്നതിനു സ്ത്രീക്കും പുരുഷനും സമൂഹം നല്‍കുന്ന ആശീര്‍വാദം കൂടിയാകുന്നു വിവാഹം.

സമ്പന്നനും ദരിദ്രനും, പണ്ഡിതനും പാമരനും, ഉന്നത ജാതിക്കാരനും ഹീനജാതിക്കാരനും തങ്ങള്‍ക്ക് കിട്ടാവുന്നതില്‍ വച്ച് ഏറ്റവും നല്ല ഇണയെ വിവാഹം ചെയ്തു ലൈംഗികത ആസ്വദിക്കുന്നവരാണ്. മറ്റു പല കാരണങ്ങളുടെ സമ്മര്‍ദ്ദങ്ങള്‍ക്ക്‌ വിധേയമായി വിവാഹ ബന്ധം വേര്‍ പെടുന്നതും സര്‍വ്വ സാധാരണമാണ്. അപൂര്‍വ്വം ചില കേസുകളില്‍ ലൈംഗികത തന്നെയും കാരണമാകാറുണ്ട്.

ഇത്രയൊക്കെ കൊട്ടിഘോഷിക്ക പ്പെടുന്ന വിവാഹങ്ങളുടെ ആപേക്ഷികത എന്ന് പറയുന്നത് ഒന്നുകില്‍ വിവാഹ മോചനം വരെയോ അതുമല്ലെങ്കില്‍ ജീവിത പങ്കാളികളില്‍ ഒരാളുടെ മരണം വരെയോ മാത്രമാണ്.

കേരള സമൂഹത്തില്‍ നാമ മാത്രമായ ക്നാനായ സമുദായം വിവാഹവുമായി ബന്ധപ്പെട്ടു രണ്ടു കാര്യങ്ങളില്‍ ശ്രദ്ധയര്‍ഹിക്കുന്നു. ഒന്ന്; വിവാഹ ആര്‍ഭാടങ്ങള്‍ക്കു ചെലവഴിക്കുന്ന ഭീമമായ തുക. രണ്ടു; വിവാഹ മോചനം ആവശ്യപ്പെട്ടു വിധിയും കാത്തു കഴിയുന്നവരുടെ ബാഹുല്യം.

ഈ രണ്ടു വസ്തുതകള്‍ വേണ്ട വിധം സമുദായ നേതൃത്വം കണക്കിലെടുത്തിട്ടുണ്ടോ എന്ന കാര്യം സംശയമാണ്. വിവാഹം

ആശീര്‍വ ദി ക്കുന്നതിന് ഒരു കാര്‍മ്മികന്‍ വേണം. സാധാരണ നിലയില്‍ ഇടവക വൈ ദി കനെയാണ് വിശ്വാസികള്‍ ഇതിനു വേണ്ടി ആശ്രയിക്കുന്നത്. നിസഹായരും സാമ്പത്തിക ഞെരുക്കം ആവശ്യത്തില്‍ കവിഞ്ഞും അനുഭവിക്കുന്ന ചിലര്‍ ക്കെങ്കിലും ഇത്തരം സന്ദര്‍ഭങ്ങളില്‍ ഇടവക വികാരിമാരില്‍ നിന്നും കയ്പേറിയ അനുഭവങ്ങള്‍ ഉണ്ടായി ട്ടുണ്ട്. ദേശ കുറി, വിളിച്ചു ചൊല്ല്, ചെറുക്കന്റെയോ പെണ്ണിന്റെയോ അവധി തീരുന്നതിനു മുമ്പ് കല്ല്യാണം നടത്തുന്നതിനുള്ള സാങ്കേതിക ബുദ്ധി മുട്ട് എന്ന് വേണ്ട,

എന്തിനും ഏതിനും മുടക്ക് ന്യായം പറഞ്ഞു ബുദ്ധിമുട്ടിക്കുന്ന "ദൈവ ദാസന്മാര്‍ക്ക്" പഞ്ഞമില്ലാത്ത സമുദായം കൂടിയായിരുന്നു നമ്മുടേത്‌.

ഇന്ന് ചിത്രം കുറേക്കൂടി മാറിയിരിക്കുന്നു. ഒരു വൈദിക ന്റെ സ്ഥാനത്ത് ഒന്‍പതും പന്ത്രണ്ടും ഇരുപതും വൈദികരാണ്‌ വിവാഹം ആശീര്‍വ ദി ക്കാനെത്തുന്നത് !

വൈദികരുടെ എണ്ണം വര്‍ധിപ്പിച്ച് മത്സരിച്ച് മടുത്തവര്‍ പുതിയ കളികളുമായി രംഗം കൊഴുപ്പിക്കുകയാണ്. ഇടയ ശ്രേഷ്ഠ നെയാണ് ഇതിനവര്‍ കരുവാക്കിയിരിക്കുന്നത്. ഈ കളികള്‍ കൊണ്ട് ആര്‍ക്കെന്തു നേട്ടം?

ഇടയ ശ്രേഷ്ടന്‍ ഇത്തരം കാര്യങ്ങളില്‍ പാലിക്കുന്ന മാനദണ്ഡം എന്താണ്? പണക്കൊഴുപ്പ് കൂടുന്നതിനനുസരിച്ച് വിളിച്ചാല്‍ വിളിക്കുന്നിടത്ത് പറന്നെത്തുന്ന വിധേയത്വമാണോ ഇടയ ശ്രേഷ്ടന് വിശ്വാസിയോട് ഉണ്ടാകേണ്ടത്?

സാധാരണ വിശ്വാസി ഇതില്‍ നിന്നും എന്ത് ഗുണപാഠം പഠിക്കണം? അവനെ തൃപ്തിപ്പെടുത്തുന്ന എന്ത് വിശദീകരണമാണ് നല്‍കാനുള്ളത്? പ്രബോധനങ്ങളും പ്രവര്‍ത്തികളും കൊണ്ടുള്ള ഇത്തരം ഞാണിന്മേല്‍ കളികള്‍ സത്യസന്ധരായ വിശ്വാസികളുടെ ആത്മ ബോധങ്ങളില്‍ അജീര്‍ണ്ണ തയുടെ മനം പുരട്ടല് കള്‍ക്ക് കാരണമായേക്കാം.

ക്രിസ്തു രക്ഷകന്‍

2010-04-13T09:12:00.000-07:00

ക്രിസ്തുവിന്റെ പ്രബോധനങ്ങള്‍ ക്രിസ്ത്യാനികള്‍ അല്ലാത്തവര്‍ക്കും പ്രിയങ്കരമാണ്. മറ്റു മതസ്ഥരില്‍ നിന്നും വ്യത്യസ്തമായി ക്രിസ്ത്യാനികള്‍ ക്രിസ്തുവില്‍ കാണുന്ന മഹത്വം ക്രിസ്തുവിന്റെ കുരിശു മരണവും ഉയിര്‍പ്പുമാണ്.

ക്രിസ്തുവിന്റെ ഭൌതിക ജീവിതം സംബന്ധിച്ച് ആരെന്ത് എഴുതിയെന്നുള്ളത് ഭൌതിക വ്യവഹാരങ്ങള്‍ മാത്രമാണ്. ക്രിസ്തു വിവാഹിതനായിരുന്നുവെന്നും കുട്ടികളുണ്ടായിരുന്നുവെന്നുംമറ്റും തെളിയിക്കാന്‍ ശ്രമിക്കുന്നത് ക്രിസ്തുവിന്റെ മഹത്വത്തിന് മങ്ങല്‍ എല്പിക്കുന്നില്ല . കാരണം ലോകത്തിന്റെ പാപങ്ങള്‍ക്ക്‌ വേണ്ടി ഒരാള്‍ അതിനു മുമ്പോ അതിനു ശേഷമോ മരണം വരിച്ച ചരിത്രം ഉണ്ടായിട്ടില്ല.

കല്പനകളുടെ ലംഘനങ്ങളിലൂടെ പാപികളായി തീര്ന്നവര്‍ക്ക് ക്രിസ്തുവിന്റെ ദേഹ ബലിയിലൂടെ പാപ മോചനം. ക്രിസ്തുവിനെ രക്ഷകനായി സ്വീകരിക്കുന്നതിലെ ലോജിക് ഇത് തന്നെ. കരിക്കന്‍വില്ലാ കൊലക്കേസിലെ മുഖ്യ പ്രതി ജയില്‍ മോചിതനായതിനു ശേഷം അറിയപ്പെടുന്ന സുവിശേഷ പ്രവര്‍ത്തകനായി മാറിയെങ്കില്‍ അതിനു പിന്നില്‍ ഈ ലോജിക് തന്നെയാണുള്ളത്.

കൊലപാതകമോ മറ്റു മാരക പാപങ്ങലോ ചെയ്ത് പശ്ചാത്താപ വിവശരായി സുവിശേഷ വേലയിലെര്‍പ്പെടുന്നതും വെറും ഭൌതിക നേട്ടങ്ങള്‍ക്ക്‌ വേണ്ടി ദൈവദാസനായി സ്വയം അവരോധിക്കുന്നതും തമ്മില്‍ വ്യത്യാസമുണ്ട്.

വിശ്വാസം

2010-04-13T02:57:00.000-07:00

മതം, ശാസ്ത്രം, രാഷ്ട്രീയം തുടങ്ങിയ വിഷയങ്ങള്‍ നാമൊക്കെ ജനിച്ച നാള്‍ മുതല്‍ കേള്‍ക്കുകയും പഠിക്കുകയും ചെയ്യും. മനുഷ്യായുസിനു മനസിലാക്കാനും വിശകലനം ചെയ്യാനും കഴിയുന്നതിനെക്കാള്‍ ആഴത്തിലാണ് പലപ്പോഴും ഇവയുടെ സ്ഥാനം.
ക്രിസ്തുവിനെ "ആശാരി ദൈവം" എന്ന് ചില ഭൌതിക വാദികള്‍ വിശേഷിപ്പിക്കാറുണ്ട്. ക്രിസ്തുവിനെ മനുഷ്യനായി അംഗീകരിക്കുന്നതില്‍ ആര്‍ക്കും എതിര്‍പ്പില്ല. മുസ്ലീമുകള്‍ പ്രവാചകനായും കാണുന്നു. ദൈവ പുത്രനായി കന്യകയിലുള്ള ജനനവും മരണത്തെ തുടര്‍ന്ന് ഉയിര്ത്തെഴുന്നെല്‍പ്പുമാണ് ക്രിസ്ത്യാനികള്‍ ഉള്‍പ്പെടെ പലര്‍ക്കും പിടി കിട്ടാതെ പോകുന്ന സമസ്യ.
വിശ്വാസം എന്നാല്‍ പ്രത്യാശയാണ്. ആത്മാവിന്റെ രക്ഷയിലുള്ള പ്രത്യാശ.

മരണശേഷം ആത്മാവിന്റെ അവസ്ഥ എന്തെന്നറിയണമെങ്കില്‍ മരിച്ചു നോക്കുക തന്നെ വേണം. പണ്ഡിതനും പാമരനും ഇക്കാര്യത്തില്‍ യോജിക്കുക തന്നെ ചെയ്യും.
ഭൌതിക ജീവിതത്തില്‍ ദൈവത്തെയും വിശ്വാസത്തെയും അന്വേഷിക്കുന്നത് പലപ്പോഴും എളിയവരും പാപികളും രോഗികളും ആലംബഹീനരുമാണ്. ജനനം മുതല്‍ മരണം വരെ സുഭിക്ഷിതയില്‍ മാത്രം ജീവിക്കാന്‍ വിധിക്കപ്പെട്ടിട്ടുള്ളവര്‍ ഉണ്ടെങ്കില്‍, അവര്‍ക്ക് ദൈവവും വിശ്വാസവും പ്രാര്‍ത്ഥനയും ഒക്കെ വെറും കിറുക്കുകള്‍ മാത്രമായി തോന്നും.

മനുഷ്യന്‍ കുരങ്ങില്‍ നിന്ന് രൂപ പരിണാമം പ്രാപിച്ചുവെന്നു സ്വയം വിശ്വസിക്കുകയും മറ്റുള്ളവരെ വിശ്വസിപ്പിക്കാന്‍ ശ്രമിക്കുകയും ചെയ്യുന്ന യുക്തിവിശ്വാസി ശാസ്ത്രം വികസിക്കുന്നതും കാത്തിരിക്കും. എന്തിനും ഏതിനും അവര്‍ക്ക് ശാസ്ത്രത്തിന്റെ പിന്‍ബലം ആവശ്യമുണ്ട്. അവരുടെ ദൈവം ശാസ്ത്രമാല്ലെങ്കില്‍ പിന്നെന്ത്?

ആത്മാവിന്റെ രക്ഷയെക്കുറിച്ച് മാത്രം ഘോഷിച്ചാല്‍ കഞ്ഞി കുടി മുട്ടുമെന്നു മനസിലാക്കിയ ആത്മീയ വാദികള്‍ ആണ് വിദഗ്ധമായി ഭൌതിക രക്ഷയ്ക്ക് ഉതകുന്ന വിധത്തില്‍ വിശ്വാസത്തെ ആചാര-അനുഷ്ട്ടനങ്ങളായി പുനര്ക്രമീകരിച്ചത്.

ദാരിദ്ര്യവും പഞ്ഞവും ജീവിതത്തില്‍ ഉടനീളം ആടി തിമിര്‍ക്കുമ്പോള്‍ ബൂര്‍ഷ്വാ കളില്ലാത്ത തൊഴിലാളിവര്‍ഗ സര്‍വാധിപത്യം സ്വപ്നം കാണും ദരിദ്ര യുക്തിവാദി. കോഴിമുട്ട വിറ്റ് ഉണക്കമീന്‍ വാങ്ങി ദാരിദ്ര്യത്തിന് ഭക്ഷണം നല്‍കുന്ന ദരിദ്ര വിശ്വാസിയും കാണും ഇതുപോലുള്ള സ്വപ്നങ്ങള്‍. അത്ഭുതങ്ങള്‍ പലപ്പോഴും സംഭവിക്കുന്നത് വിശ്വാസിയുടെ ജീവിതത്തിലാവും. ഇത് മുതലെടുക്കുന്നതും ദൈവ ദാസരാണ്.

ദൈവത്തിലോ ശാസ്ത്രത്തിലോ രാഷ്ട്രീയത്തിലോ വിശ്വസിച്ചോ വിശ്വസിക്കതെയോ ആര്‍ക്കും എവിടെയും ജീവിക്കാം. ക്രിസ്തു കേവലം മനുഷ്യപുത്ര നാണെന്ന് കരുതിയാല്‍ തന്നെ രണ്ടായിരത്തിലധികം വര്‍ഷമായി ഇന്നും ലോകത്തിന്റെ വിവിധ ഭാഗങ്ങളില്‍ അത്ഭുതങ്ങളും അടയാളങ്ങളും കാണപ്പെടുന്നു എന്നുള്ളത് ആര്‍ക്കു നിഷേധിക്കാനാവും? മാജിക്കോ മന്ത്രമോ എന്തുമാകട്ടെ, മുന്നൂറ്റി മുക്കോടി ദൈവങ്ങളുള്ളതില്‍ ഈ നാമം മാത്രം ഇന്നും ശക്തമായി മനുഷ്യന്റെ ഭൌതിക ജീവിതത്തില്‍ ഇടപെടുന്നു വെന്നത് സത്യമാണ്.

വ്രണപ്പെടുന്ന ക്നാനായ ആചാരങ്ങള്‍

2010-04-10T08:06:00.000-07:00

"ഇന്നലെ ചെയ്തോരബദ്ധം ചിലര്‍ക്കിന്നത്തെ ആചാരമാകാം. നാളത്തെ ശ്രാസ്ത്രമാതാകാം" എന്ന്‌ കവി വാക്യം. മറ്റു പല ജാതി-സമുദായങ്ങള്‍ക്കുള്ളതുപോലെ ക്നാനായ സമുദായത്തിനും തനതായ ആചാരാനുഷ്ഠാനങ്ങള്‍ ഉണ്ട്‌. വിവാഹമെന്നതിന്‌ ഏതൊരു വ്യക്തിയുടെയും ജീവിതത്തില്‍ മര്‍മ്മപ്രധാനമായ സ്ഥാനമാണുള്ളത്‌. ചിലര്‍ സാമ്പത്തികമായി രക്ഷപെട്ടതിനു ശേഷം വിവാഹത്തെ കുറിച്ച് ആലോചിക്കുമ്പോള്‍ മറ്റു ചിലര്‍ കല്ല്യാണം കഴിച്ച്‌ "രക്ഷ" പെടുന്നതിനെ കുറിച്ചായിരിക്കും ചിന്തിക്കുന്നത്‌.

ആഘോഷങ്ങളുടെ കാര്യത്തിലും ആചാരാനുഷ്ഠാനങ്ങളിലും രണ്ടു കൂട്ടര്‍ക്കും സമാന ചിന്താഗതി തന്നെയാണുള്ളത്‌. വ്യക്തി ജീവിതത്തിലെ മറ്റു ചടങ്ങുകളെയൊക്കെ നിഷ് പ്രഭം ആക്കികൊണ്ട് വിവാഹത്തോടനുബന്ധിച്ചുള്ള "ചന്തം ചാര്ത്ത്‌", "മയ്ലാഞ്ചി ഇടീല്" ചടങ്ങുകള്‍ അന്തവും കുന്തവുമില്ലാത്ത "കാളിയമര്‍ദ്ധനങ്ങ"ളായി മാറി കഴിഞ്ഞു.

കാലാകാലങ്ങളായി വിവിധ കോണുകളില്‍ നിന്നും ഇതിനെതിരേ ഉയര്‍ന്നുകൊണ്ടിരുന്ന ഒറ്റപ്പെട്ട ദുര്‍ബല ശബ്ദങ്ങള്‍ ഭ്രമണപഥം വിട്ട മട്ടാണ്‌. പുതിയ വിമര്‍ശനങ്ങളുടെ നിജ സ്ഥിതി പരിശോധിക്കുമ്പോള്‍ പഴയ വിമര്‍ശനങ്ങള്ക്ക്‌ വേണ്ടത്ര പ്രസക്തിയില്ലെന്ന്‌ മനസ്സിലാകും.

മൈക്ക്‌ സെറ്റും പാട്ടുകാരും വീഡിയോഗ്രാഫര്‍മാരുടെ ചടങ്ങു നിയന്ത്രണവും പന്തലില്‍ പരസ്യമായി മദ്യം വിളമ്പിയതുമൊക്കെയാണ്‌ പഴയ കാല വിമര്‍ശകരുടെ പ്രശ്നങ്ങള്. ഇന്നത്തെ വൃണങ്ങളുടെ ആഴവും വ്യാപ്തിയും നോക്കുമ്പോള്‍ ഇതൊക്കെ വെറും ചൊരിയും ചിരങ്ങുകളും മാത്രം!

ആചാരാനുഷ്ഠാനങ്ങളുടെ ചരിത്രപരമായ ഉറവിടം കണ്ടെത്തേണ്ടതും പ്രചരിപ്പിക്കേണ്ടതുമൊക്കെ സഭാ നേതൃത്വത്തിന്റെ ഉത്തരവാദിത്തത്തില്‍പെട്ട കാര്യങ്ങളാണ്‌. ഇതിനപ്പുറം സാമാന്യ ബുദ്ധിക്കു നിരക്കുന്ന ചില സത്യങ്ങള്‍ ഈ ആചാരങ്ങള്‍ നമ്മെ ഓര്‍മ്മപ്പെടുത്തുന്നുണ്ട്‌. ബന്ധു മിത്രാദികളും ചാര്‍ച്ചക്കാരുമടങ്ങുന്നവരുടെ സാന്നിധ്യം. വരനെയും വധുവിനെയും മോടി പിടിപ്പിക്കല്‍ (ക്ഷുരകന്‍ ചടങ്ങില്‍ സംബന്ധിച്ച്‌ കൂടി വന്നിട്ടുള്ളവരുടെ സാന്നിധ്യത്തില്‍ മണവാളനെ ക്ഷൌരം ചെയ്ത്‌ എണ്ണ തേപ്പിക്കുന്നതൊക്കെ ഇതിന്റെ ഭാഗമാണ്‌).

പിതൃ സഹോദരന്മാരില്‍ നിന്ന്‌ ഇഛപ്പാട്‌ (പാച്ചോറും സര്‍ക്കരയും ) സ്വീകരിക്കുന്നതും മറ്റും ബന്ധത്തിന്റെ തീവ്രതയെ സൂചിപ്പിക്കുന്നു.
പെങ്ങന്മാര്‍ക്കും അളിയന്മാര്‍ക്കും അവരവരുടേതായ കര്‍ത്തവ്യങ്ങളാണുള്ളത്‌. സദ്യവട്ടമൊരുക്കുന്നതില്‍ അയല്‍വാസികള്ക്ക്‌ നിര്‍ണ്ണായക പങ്കാണുള്ളത്‌. ചുരുക്കത്തില്, എല്ലാവരും ചേര്ന്ന്‌ കൂട്ടായ്മയോടെ ഉള്ളത്‌ പങ്കു വച്ചനുഭവിച്ചാസ്വദിക്കാനുള്ളതായിരുന്നു ഇത്തരം ആചാരങ്ങള്.

ഇതില്‍ നിര്‍ണ്ണായക പങ്കു വഹിച്ചിരുന്ന അയല്‍വാസികള്‍ കാഴ്ചക്കാരായി മാറുന്നതാണ് കാലം മാറിയപ്പോള്‍ നാം കണ്ടത്‌. ക്രമേണ ബന്ധു മിത്രാദികളും ചാര്‍ച്ചക്കാരുമൊക്കെ ആ നിലയിലേക്ക്‌ മാറ്റപ്പെടാതെ തരമില്ലെന്നായി. എല്ലാവരും കാഴ്ചക്കാരാവുകയും കാഴ്ചക്കാരുടെ എണ്ണം വര്‍ദ്ധിക്കുകയും ചെയ്തതോടെ പുതിയ പുതിയ കാഴ്ചകള്‍ സമ്മാനിക്കുന്നതില്‍ മല്‍സരമായി. സ്വദേശത്തു നിന്നും വിദേശത്തു നിന്നും സമുദായാംഗങ്ങള്‍ സ്വരുക്കൂട്ടിയ പണക്കൊഴുപ്പ്‌ ഇത്തരം മല്‍സരങ്ങള്ക്ക്‌ വളമേകി.

അമേരിക്കയിലുള്ള ക്നാനായക്കാരന്റെ ചന്തം ചാര്‍ത്ത് വീഡിയോ അടുത്തെയിടെ കമ്പ്യൂട്ടറില്‍ പ്രചരിക്കുകയുണ്ടായി. ക്നാനായ വിവാഹ ആചാരങ്ങളുടെ പ്രചരണമെന്ന മട്ടിലുള്ളതാണ്‌ ഈ വീഡിയോ. മനോഹരമായി അലങ്കരിച്ചിട്ടുള്ള വളരെ വിശാലമായ ഹാളിലാണ്‌ ചടങ്ങ്‌.

റിയാലിറ്റി ഷോകളിലും സിനിമാ അവാര്‍ഡ് ദാന ചടങ്ങുകളിലുമൊക്കെ കാണുമ്പോലെ അനൌണ്സ്മന്റിനെ തുടര്‍ന്ന്‍ മണവാളന്‍ സെറ്റു മുണ്ടുടുത്ത വിദേശിയുടെ കൈ പിടിച്ച്‌ സ്റ്റേജിലേക്ക്‌ വരുന്നു. പശ്ചാത്തലത്തില്‍ ഡബ്ബാംകുത്ത്‌ തമിഴ്‌ പാട്ട്‌ കേള്‍ക്കാം. ഇവരെ തുടര്‍ന്ന്‍സൈക്കിളില്‍ കടന്നു വരുന്നു ക്ഷുരകന്‍മാര്‍.

ക്നാനായക്കാരെ തീര്‍ത്തും അസ്വസ്തരാക്കാന്‍ പോന്നതാണ്‌ ഈ സീനുകള്. നാട്ടിന്‍ പുരങ്ങളിലുള്ള ക്നാനായക്കാരന്‍ പണക്കൊഴുപ്പ്‌ കൂടുന്നതിനനുസരിച്ച്‌ മണവാളന്റെ കൌപീനത്തില്‍ മണികളുടെ എണ്ണം കൂട്ടുകയും പടക്കങ്ങളും അമിട്ടും പൊട്ടിച്ച്‌ അയല്‍പ്രദേശങ്ങളിലുള്ളവരെ ഭയവിഹ്വലരാക്കുകയും ചെയ്യും . അവര്ക്ക്‌ സ്വപ്നം കാണാന്‍ പറ്റാത്ത ധൂര്‍ത്തുമായിട്ടാണ്‌ അമേരിക്കക്കാരന്റെ അടുത്ത തലമുറയുടെ പടപ്പുറപ്പാടെന്നു വ്യക്തം .

ചന്തം ചാര്‍ത്തിനു ചെലവാക്കിയ തുകയുടെ അടിസ്ഥാനത്തില്‍ നിലനില്‍ക്കുന്നതല്ലല്ലോ കുടുംബജീവിതം . സന്നിഹിതരായ പുരോഹിതരുടെ ബാഹുല്യവും മേലധ്യക്ഷന്റെ സാന്നിധ്യവുമൊന്നും തന്നെ കുടുംബജീവിതത്തിന്റെ കെട്ടുറപ്പിനെ നിലനിര്‍ത്താന്‍ പര്യാപ്തമാകുന്നില്ല. എല്ലാം ഇവര്‍ക്ക് ഷോയും തമാശയും ആയിരിക്കാം . വിവാഹവും വിവാഹ മോചനവും വീണ്ടും വിവാഹവുമൊക്കെ. എന്തിനും ഏതിനും കുഴലൂതാന്‍ പുരോഹിത വൃന്ദവും കൂടെ തന്നെ കാണുമായിരിക്കും.

എന്നാല്‍ സമുദായത്തിലെ ഇത്തരം വൃണങ്ങളിലെ പഴുപ്പും ചലവും താഴേക്കിടയിലുള്ളവരെ കൂടി ബാധിക്കുമെന്ന കാര്യം ആരോര്‍ക്കുന്നു ?

സമാധാനമില്ലാത്ത സന്മനസുകള്‍ക്ക്..

2010-04-10T07:41:00.000-07:00

അനുഭവങ്ങള്‍ അറിവിന്റെ അക്ഷയ ഖനികളാണ് . അനുഭവങ്ങള്ക്ക്‌ കൈപ്പും രുചിയുമുണ്ട്‌. രുചിയേറിയ അനുഭവസാക്ഷ്യങ്ങളാല്‍ ശബ്ദമുഖരിതമാണ്‌ നമ്മുടെ ചുറ്റുപാടുകള്. കൈപ്പു ഏറിയതും ഓര്‍ക്കാനിഷ്ടപ്പെടാത്തതുമായ ഒട്ടനവധി അനുഭവസാക്ഷ്യങ്ങളുടെ വിഴുപ്പു ഭാണ്ഡങ്ങളാല്‍ സമ്പന്നമാണ്‌ ഓരോ മനുഷ്യമനസ്സും.

ദ്രശ്യ -പത്രമാധ്യമങ്ങളില്‍ പ്രത്യക്ഷപ്പെടുന്ന ഓരോ ആനുകാലിക സംഭവങ്ങളിലും വാര്‍ത്തകളിലും സത്യത്തിന്റെ ആത്മാവ്‌ പലപ്പോഴും നഷ്ടപ്പെടുന്നു. പക്ഷമെന്നും നിഷ്പക്ഷമെന്നും രണ്ട്‌ പക്ഷം ചേര്ന്ന്‌ അര്‍ദ്ധസത്യത്തെ കീറി പറിച്ച് വായനക്കാരന്റെ ധിഷണയ്ക്ക്‌ അന്നന്നു വേണ്ട അന്നം നല്‍കുന്നവര്‍ സത്യത്തെ എന്നെന്നേക്കുമായി ഇരുട്ടറകളില്‍ ഒളിപ്പിക്കുന്നു.

സത്യത്തെ അന്വേഷിക്കുന്നത് ദൈവത്തെ അന്വേഷിക്കുന്നതിനു തുല്യം. കാരണം ദൈവം സത്യമാണ്‌. അര്‍ദ്ധസത്യങ്ങള്‍ നല്‍കുന്ന മങ്ങിയ വെളിച്ചത്തില്‍ സത്യത്തിന്റെ ഇരുട്ടറകളിലേക്കൂള്ള പ്രയാണം ദുഷ്കരമെങ്കിലും തുടരുന്നവര്‍ക്ക്‌... സമാധാനമില്ലാത്ത സന്മനസുകള്‍ക്ക്...

സഭയും ആഗോള ബാല രതിയും..

2010-04-10T07:34:00.001-07:00

സ്വവര്‍ഗ രതി ഒളിഞ്ഞും തെളിഞ്ഞും നില നില്‍ക്കുന്നു. ബാല്യ കാലം പിന്നിടുന്നതിനു മുമ്പ് തന്നെ സെമിനാരികളിലെത്തിപ്പെടുന്ന വൈദിക വിദ്യാര്‍ഥികള്‍ അഭിമുഖീകരിക്കുന്ന പ്രതിസന്ധി കൂടിയാണിത്. പ്രതിസന്ധികള്‍ തരണം ചെയ്ത് ദൈവ ദാസരായി തീരുന്നതോടെ ബാല പീഡയുടെ ഉത്തരവാദിത്തം ഇവര്‍ സ്വയം ഏറ്റെടുക്കുന്നു. റാഗിങ്ങിന്റെ കാര്യം പോലെ തന്നെ ഇന്നത്തെ ഇര നാളത്തെ വേട്ടക്കാരന്‍! അപവാദങ്ങള്‍ ഇല്ലാതില്ല. ഭൂരിപക്ഷം. ചിലപ്പോള്‍ ന്യൂനപക്ഷം.

രതി നല്‍കുന്ന അനുഭൂതിയാണ് ഒരു പരിധി വരെ ഇതിനെതിരെയുള്ള പ്രക്ഷോഭങ്ങളെ പ്രതിരോധിക്കുന്നത്. ഇരയും വേട്ടക്കാരനും ഒരിക്കലും പ്രക്ഷോഭം ഉണര്‍ത്തുന്നില്ല. കാരണം അവരിതിന്റെ ഗുണ ഭോക്താക്കളാണ്. മറിച്ച്, സമൂഹം ഇതിനെ പാപമായും ക്രൂരമായും വിമര്‍ശിക്കുന്നു.

സെമിനാരി സംവിധാനങ്ങള്‍ ദുരുപയോഗിച്ചിട്ടുള്ള ഇത്തരം അധമന്മാര്‍ ആത്മീയ ജീവിതത്തിലുടനീളം നൂറു കണക്കിന് പൈതങ്ങളെ ഈവിധം ദുരുപയോഗിക്കുന്നു. തിരുപ്പട്ടം തിരസ്കരിച്ച് വിവാഹ അന്തസ് തെരഞ്ഞെടുത്ത് ഇഷ്ടപ്പെട്ട സ്ത്രീയോടൊപ്പം കുടുംബ ജീവിതം നയിക്കനാഗ്രഹിക്കുന്നവരെ നമ്മള്‍ വിശ്വാസികള്‍ വെറുക്കുന്നു. നമ്മുടെ തെറ്റായ കാഴ്ച പാടുകള്‍ക്ക് ശരിയായ ദിശാബോധം നല്‍കുവാന്‍ ആരെയാണ് നാം സമീപിക്കേണ്ടത്?